Gaming ម៉ូនីទ័រ​កប់​ស៊េរី​របស់ Predator ចេញ​ថ្មី​

Predator មួយរយៈពេល​កន្លង​ទៅ​នេះ បាន​កំពុង​ពង្រីកទីផ្សារ​របស់​ខ្លួន​បាន​យ៉ាង​ខ្លាំងក្លា ហើយ​ក៏​កំពុង​ដណ្ដើម​យក​ទីផ្សារ​គូប្រជែង​របស់​ខ្លួន​យ៉ាងចាស់ដៃដែរ ព្រោះ​ថា​ផលិតផលរបស់ Predator ចេញមកថ្មីៗ​កន្លង​ទៅ​គឺមានភាពលេចធ្លោ និងមានចំនុចពិសេសៗគួរឲ្យចាប់អារម្មណ៍ច្រើន។ ជាក់ស្ដែងម្សិលមិញ Predator ក៏បានបញ្ចេញ Gaming ម៉ូនីទ័រថ្មីមួយផ្សេងទៀតរបស់ខ្លួន ដែលមានឈ្មោះថា Z35P ផលិត​ឡើង​ក្រោមស្នាដៃរបស់ Acer ក្រោមស្លាកយីយោរបស់ Predator។

Z35P មានលក្ខណៈពិសេសច្រើន ដោយហេតុថាវាមានទំហំអេក្រង់ធំខ្លាំងមែនទែនដល់ទៅ 35​ អ៊ីញ ជាមួយ​នឹង​សមត្ថភាពបង្ហាញរូបភាពបានក្នុងកម្រិត 2K ឬស្មើរនឹង 3440 x 1440p ជាប្រភេទអេក្រង់ Wide Quad-HD ល្អបំផុតសម្រាប់ Gamer ក្នុងការលេងហ្គេមក្នុងកម្រិត Resolution ខ្ពស់។ Acer ក៏បាន​បំពាក់​មក​ជាមួយបច្ចេកវិទ្យា G-Sync និង Ultra Low Motion Blur ទៀតផង ធ្វើឲ្យក្រាហ្វិច Redner ឬរត់​នៅ​លើផ្ទៃអេក្រង់កោងធំមួយនេះ មានសភាពរលូន គ្មាន lag ឬជួបបញ្ហា Screen Tearing ឡើយ។ ម្យ៉ាងវិញទៀត វាក៏មានល្បឿន Refresh Rate ដល់ទៅ 100Hz និង 4ms ក្នុងការទទួលការបញ្ជាពីម្ចាស់ (Response Time) ទៀតផង ធ្វើឲ្យវាឈក្នុងលំដាប់កំពូលមួយនៃ Gaming Monitor ថ្លៃៗនា​ពេល​បច្ចុប្បន្ន បើទោះបីជាវានៅមិនទាន់ចេញលក់ក៏ដោយ ដោយ Acer បើកឲ្យអតិថិជនខ្លួនធ្វើការកម្មង់​កក់​ទុក​មុន។

Predator Z35P បំពាក់មកជាមួយរន្ធបំពងសម្លេងចំនួន 2 កន្លង 18​ watt ដែលម្ចាស់របស់វាពុំចាំបាច់ប្រើ Speaker ពីខាងក្រៅក៏បាន ដោយការបញ្ជូនទិន្នន័យធ្វើឡើងតាមរយៈរន្ធ HDMI និង DisplayPort 1.2 និងអាចកាច់បង្វិលបាន 178 ឌឺក្រេទៀតផង អមមកជាមួយនឹងមុខងារជាច្រើនផ្សេងទៀត ដែលត្រៀម​នឹង​ចេញ​លក់​នៅអាមេរិកនាខែក្រោយនេះក្នុងតម្លៃ 1099$ ឯណោះ ហើយបើមកដល់ស្រុកខ្មែរអាចនឹង​ថ្លៃជាង​នេះ។